\WelcomeToQuljeedNet Awdal 

 

 

 

 

  Home    Contact Us   About US          

 

06-1-2013

Saylac  Waa Somaliland, Xornimada  Saylacna Waxay Sharaf U Tahay Shacbiga Somaliland Oo Dhan Iyo Dawlada Dalka Ka Talisa Ee Yaan Saylac Laga Dhigin Wax Shandada Lagu Qaadi Karo.

Morankii maamul usamaynta  ee ka taagnaa degaanka Saylac oo haatan soo dhamaaday  ayaa hadana noqoday mid  nin walba sida uu jecelyahay uu udhigo iyada oo dadka  wararkaa aadka u buunbuuniyina  ka sheekaynayaan balaayooyin iyo colaado u gaar ah dadka degaanka wada dega oo aad moodaba in meeshii loo rogay aag dagaal oo udhexeeya Ciise iyo Gadabuursi iyada oo meeshaba laga Saaray inuu shaqayn karo awoodii iyo maamulkii dawliga ahaa ee marka horaba la isku haystay.

Waxana sii xoogaysanaya aaminsanaantii la aaminsanaa  in xaaladu tahay mid u dhaxaysa  Ciise oo dawlada Djibouti wata iyo Gadabuursi oo bilaa dawlada oo kaligii taagan, oo ay waliba dadka qaar faafinayaan brobagaandhe ah in Somaliland iyo Djiboutiba arintan heshiis ku yihiin oo ay rabaan in aan Gadabuursi Saylac maamulkeeda loo ogolaan inkasta oo arintu ku dhamaatay sidii xildhibaanadii aqlabiyada helay  rabeen.

Dadka qaarna waxayba ku doodayaan in Djibouti cadaadis xoogan oo aan la garanayn wuxuu ku salaysanyahay  ku saartay SL in ay iyada udeyso talada degmada Saylac arintaas oo umuuqata mid aan sal iyo raadtoona lahayn lana garanayn waxa tuhunka nuucana keenay iyada oo ay aqligaba ka weyntahay in Soomaliland oo ah daljiraayi hadyad usiiso dhulkeeda dalkale.

Balse marka dhabta loo hadlo arinta iyo moranka Saylac ma ahayn mid ku salaysnaa xuduud qaybsi udhexeeya labada dal  ee Somaliland iyo Djibouti, ama dooda  gorfaynta Saylac ka dhalatay  ma ahayn in Somaliland faraha kala laabato nabadgalyo daro iyo fanqalaalo ka dhaca degaankaas.

Xukumada Siilaanyona hadii ay daawato cid kasta oo nebedgalyada degaankaas wax u dhimaysa ciday doontaba ha ahaatee iyada ayaa ku ceebaysan ileyn sobobta ay u jirto ee ay dawlada ku tahay  waa inay ilaaliso xuduudaha iyo nabadgalyada dadka iyo dalkoo dhanne.

Waxanan aaminsanahay in Siilaanyo qancinayay uun madaxweyne Geelle iyo ergadii Ciise ee aanay arinta ku saabsanayd diidmada uu Madaxweyne Siilaanyo diidayay hogaanka ay doorteen aqlabiyada golaha degaanka Saylac mid oday siilaanyo ka soo go'day.

Hadaba miyaanay haboonayn dadka arimahan ka faalloodaayi in ay horta hubiyaan waxa ay qorayaan ama ay sheegayaan, gaar ahaan qaar kamida saxaafada reer Awdal oo aad moodaba baryahan dambe in ay ku jiraan wakhti ay u horkacayaan  bulshada reer Awdal in ay noqoto mid cidla joogta oo aan saaxiib lahayn.

Nabadgalya la’aanta ku timaada Awdal/Salal, waxa ku ceebaysan wax walbana ku waayayi waa xukumada maanta SL katalisa iyadayna ku  haboontahay in ay  deganaashaha Saylac cid walba uga lexejeclo badnaato hadii kale meel walba reerka yar ee degan uunbaa calankii awoowgood ka taagan waxana iman karta in qolaba qoladay ka xoogbadantahay muquumiso oo ay dhul iyo hanti iyo sharaftaba  ka qaadato.

Si aanay taasi u imana waxa looga baahanyahay xukumada Somalilandna maanta ka talisa oo aan anigu aaminsanahay inaanay wali hayn wadadii saxda ahayd in ay xaalka dejiso tustana dadka kalsoonida wadaninimo waayo taas ayaa lagu yahay wadan jira ee hadii kale xaalku kama duwanaanayo waxa ka dhacaya jiraankeena

Dadka reer Awdal/Salal ee arintan kaligood isku mashquulinayana ama kala jiidanayana lexejecladu ma xuma waana la isku qaban karaa waxase wanaagsan marka nabadgalyada laga hadlayo  in ay madaxda xukumada kaga jirta gobolka iyo kuwa kale ee qaranka kala xisaabtamaan doonista shacabka iyo nabad galyada in ay is waafajiyaan iyaga oo aan garamarayn  hanaanka dimiqoraadiyada ee dalka ka bilawday intii ka horaysay xukumada maanta taagan.

Mar labaadna shacabka reer Awdal waxan odhan lahaa colaada iyo xumaantu ma waaraan ee wanagaa waara waana in la ogaadaa in arimahani iska dhamaan doonaan sidaa darteedna ay haboontahay in aan lagu kicin aflagaadooyin iyo waxyaalo hadhaw markay nabadi timaado inala fool xumaada. Gaar ahaan tolkay Gadabuursi waxan odhan lahaa Ciise dhulka waa inala degaa waanan is dhalay ee yaan lagu talaxtegin. Beesha Ciisana waxan odhan lahaa horay waad u maamulayseen Saylac Gadabuursina waa idin agjoogay uun ee xaalka ha la dejiyo oo caqliga wanaagsani ha shaqeeyo kuna dedaala in aad si nabada oo tartan xor  iyo xeeladba iskugujira ugu soo ceshan lahaydeen Maayarnimada Saylac haday idiin suurto gasho laakiin xoog iyo xiqdi yaynaan is dhaafsan

 Cabdale faarax Sigad

Sigad12345@yahoo.co.uk

 

 

 

 

 

 

 

 

 

 

 

 

 

 

 

Quljeednet.Com © 2010 • Privacy Policy • Terms Of Use